३.अशी पुस्तकं

(आ) पुस्तकांविषयीचा लेखकाचा दृष्टिकोन तुमच्या शब्दांत लिहा.
उत्तर: डॉ. निर्मलकुमार फडकुले यांनी ‘अशी पुस्तकं’ या पाठात पुस्तकांचे महत्त्व, मानवाच्या जडणघडणीतला त्यांचा हातभार आपल्या जीवनातील काही प्रसंगांच्या माध्यमातून मांडला आहे.
    लेखकाच्या मते पुस्तकं ही मानवाचे सर्वांत जवळचे मित्र असतात. ते कधीच आपल्या वाचकास एकटे पडू देत नाहीत. ते सतत आपल्या मित्रासोबत विचारांच्या रूपाने राहतात. ही पुस्तकं जीवनाला चैतन्य मिळवून देणारी असतात. त्यांच्या केवळ स्पर्शानेही अलौकिक सुख प्राप्त होते. निराशेच्या वेळी ही पुस्तकं आपल्याला दु:खातून, निराशेतून अलगद बाहेर काढतात.
    जीवन कसे जगावे याचे उत्तम मार्गदर्शन ही पुस्तकं करत असतात. त्यांच्यात मानवाला झपाटून टाकण्याची विलक्षण ताकद असते. ही पुस्तकं आपल्यातील ज्ञानरूपी, आनंदरूपी सुगंध वाचकाच्या मनात दीर्घकाळ दरवळत ठेवतात. पुस्तकांचे वाचन करणे ही उत्तेजक आणि आनंददायक प्रक्रिया आहे. तिची नशा शब्दांत वर्णन करता न येणारी आहे.
    लेखकाच्या मते पुस्तकं माणसाला घडवतात; पण त्याचबरोबर माणसाला उद्‌ध्वस्थ करण्याची ताकदही त्यांच्यात असते. ही पुस्तकं माणसाला जगायला शिकवतात. विविध मूल्यांची जोपासना कारायला शिकवतात. ही पुस्तकं मानवाला बंधनं तोडून मुक्‍तपणे जीवनाचा आस्वाद घ्यायला शिकवतात. या पुस्तकांतून आनंदाबरोबर दुःखाचीही अनुभूती येते. या साऱ्याचा अनुभव तेव्हाच घेता येतो जेव्हा ही पुस्तकं रसिकतेने वाचली जातात. अशा या मानवी जीवन समृद्ध करणाऱ्या पुस्तकांशी निर्दयीपणे न वागता त्यांची थोडी काळजी घेण्याची गरज आहे असे लेखक या पाठातून सुचवतो.